好心做壞事

這是一個絕佳反面教材。
用錯比喻，只會貽笑大方。
（OK，其實我睇完的第一反應是好嬲，度稿條友係咪白痴！？邏輯錯哂！）

未開封的樽裝水=乾淨
開封過兼被多人飲用的樽裝水=不乾淨
本質上是勉強說得通，但用之比喻人的身體就好有問題。
http://www.youtube.com/watch?v=9gZoCxKT0bc

短片將未開封的樽裝水比作處女/男，另一瓶已開封又被多人飲用的樽裝水自然是借喻已有性行為的身體，然後帶出一個訊息︰「咁多人掂過，都唔知有冇病，實唔乾淨喇。」

我說荒謬，原因有三︰

1) 不尊重。
請問製片人有沒有考慮過以下人士的感受？曾經不幸被侵犯的受虐者、婚姻失敗者，甚至是性工作者，總之不是處男/女的人，就是不乾淨？當他們看到以上片段時會有甚麼反應？

2) 以偏蓋全。
除了荒謬的邏輯，還有可笑的手法。利用送錢請你飲的方法強調選擇已開封樽裝水的人是傻子，言下之意是如果閣下跟一個已有性行為的人接觸（莫論婚嫁），你就係傻仔？？

3) 定義模糊。
a- 其實短片沒有證明那瓶未開封的水是如何「乾淨」。如果膠瓶等如身體，水是否等如靈魂？如是者，充其量只是膠瓶口與唾液接觸，對比未開封的那瓶，含箘量可能相對較高，但此等說法不等如未開封的那瓶是乾淨無箘。水是另一個模糊點，短片中完全沒有交代兩瓶水的來源是否一樣，難不成未開封那瓶載的是水喉水，已開封載的是已煮沸的水？既然無法證實，就不應單方面從外在判斷「潔淨」問題。好吧，就當作兩者載的都是煮沸過的水，那麼瓶子的潔淨問題是否無法解決？何不用送來的廿元，買一小瓶消毒酒精抹過膠瓶口，如無意外可消滅99.9%細菌。

b- 將一瓶已開封又被多人飲用的樽裝水比作曾經擁有超過一名性伴侶的身體（但段片又冇解釋係咪同一時間內喎，你有冇見果班人係同一時間將個嘴「隊」埋個樽度？）是不潔的象徵。喂，呢個世界有樣野叫安全套，佢嘅功能係乜唔需要解釋。我淨係想知，咁講係咪如果我揀左支未開過的水，我把口十日唔刷牙去飲都冇所謂喇呵？總之支水就一定要完壁！？

（嬲嬲地都係轉用口語）
嗱，我唔係鼓吹婚前性行為，但製片人想去強調性的「潔淨」（定聖潔？），事前係咪應該考慮一下演繹手法是否恰當？家陣呢段片，如果係話勸人唔好濫交，都勉強過骨，但原來係講乾唔乾淨嘅問題，就真係抵被人插到上天花。借問聲，人的「潔淨」問題，身體重要還是靈魂重要？

假設片段中兩瓶都是濁水，我相信路人的選擇剛好相反。