至憎

大概被小克的至憎系列感染。

自拍
唔得，頂唔住。要上鏡點解唔搵人影，得個大頭有咩好睇？至憎係用同一個樣影幾十次然後post上facebook！

《Nobody》
此歌旋律足以令我崩潰！
最難頂的一次，公司一名三十出頭的男同事以此為電話鈴聲，「I want nobody...」一響起，我有立即衝前打人的念頭。

In a relationship/ break up
又關facebook事。即係咁，閣下願意公開同邊個拍拖結婚生仔分手離婚係你嘅自由，但係你呢頭話拍拖，個頭話分手，之後又話訂婚，而呢三樣野係同一日發生，而且三日唔埋兩日就重演，請問想點呢！？最離奇係竟然有人keep住畀comment！OK，最後我選擇delete此人。

衝入車
這是我討厭搭鐵路的理由。無論西鐵東鐵抑或輕鐵，香港人永遠等唔到。車門一開就用盡辦法務求攝得就攝，要出站的一群人呢？「請先讓車上乘客落車」一句播足幾十次都無人聽到，最後只會上演人潮角力戰。某次，一名男士終於按奈不住大喊︰「我地唔出黎你地點入啊！」結果人潮如摩西分紅海般有秩序地分成兩邊！

唱K
其實我很怕這個活動，特別是一大夥的時候。搶咪、霸咪、cut歌、重唱再重唱、走音再走音全晚此起彼落，至慘我九成都唔識唱（亦都唔會唱），結果都係低頭食食食（但其實好難食）。畀百幾廿百蚊，點解我唔落pub聽人唱？

戲院變維園
請問可否在完場後才討論劇情？即使套戲爛到令你想割凳，都唔爭在忍多一陣，如果是小朋友我會體諒，但作為一個成年人，請勿喃嘸。仲有，唔該唔好再踢凳！