然後上司說要回禮，不如我們一組三人合伙送一份禮物，我不反對，意思一下也好。結果令我欲哭無淚......
起初我帶著非常市儈的想法︰不擺酒-->即是不用給人情 -->禮物不用太貴重（每人最多$200吧）
背後的邏輯是︰擺酒人到-->人情公價$500，擺酒不到-->人情公價$300，不擺酒-->人情價應該是$300內。
好，有趣的事情發生了。
我奉命前往挑選禮物，出發前︰
我︰買咩好？
K（我的上司）︰不如去Swarovski睇下。
我︰吓！？好貴喎，你budget係幾多？
K︰唔係budget問題啊，鬼叫佢係我哋manager，如果唔係我唔送添喇（！）
我︰但買舊水晶冇乜用喎，不如實用D仲開心...
K︰妳唔明喇，我哋係送個牌子，妳諗下其他人送咩畀佢，一比之下，送個幾實用都冇用喇...
我︰我去到睇下有咩揀再打畀你...
在海港城。
我︰喂，不如送廚具？新屋入伙嘛~
K︰妳又知佢新屋入伙？唔畀人哋住番舊屋？
我︰......但我見佢都好似鍾意整野食喎，佢facebook有整蛋糕d相！
K︰佢阿茂整餅就有！
我︰（啞左）......咁證明佢會入廚房嘛。
K︰佢果D叫屎忽痕，妳留意吓喇，整餅D相係出面D餅房開班咋。
我︰（再次啞左）......咁不如送電子相架？我見佢上次買左部單反，仲問你野嘅，應該鍾意影相喇。
K︰嗱，妳又唔明喇。自從上次之後，有冇再見過佢搵我？Facebook剩係post過一輯相，之後呢？
我︰咁即係點？
K︰呢D咪叫身痕囉，試完一次就唔玩架喇！
我︰OK...我再睇睇。
再逛，相中一部微型Hifi。
我︰喂，我睇中部微型Hifi啊，可以放床頭果D呢...賣$1100，個價錢都算係咁啦...
K︰（劈頭）唔得！
我︰（咩事！）...又唔得！？
K︰送畀男人都仲話，送畀女人，佢會覺得自己抽到聖誕禮物囉。
我︰吓！？...（已經發癲）...咁結婚丫嘛，呢D野咪兩公婆啱用囉！
K︰Hifi呢家野，個個人喜好都唔同，最重要係佢唔識欣賞啊......
我︰要欣賞D咩啊......
K︰如果妳買部Hifi畀佢，佢可能永遠放係床下底。
我︰（火都黎）咁送舊水晶咪又係得個擺！！！
K︰所以要去Swarovski買，起碼佢知果舊野唔係玻璃，而係Swarovski，點捨得扔呢....
我︰咪我不如去LV買個鎖匙扣，成個牌子喇。
K︰LV鎖匙扣一個幾錢丫，妳仲要掛隊去買個鎖匙扣！
我︰我真係唔明...
K︰妳信我喇，去Swarovski睇下，妳只要記住佢係一個typical的中女。
我︰（！）你隔離有冇人！？有冇開speaker？
K︰得我同C（另一 位同事），放心....
最後，我死死地氣走入Swarovski，問sales有甚麼好推薦，sales哥哥介紹了這一對結婚熊仔，說主人家一定喜歡云云......話未說完，我就決定︰「就呢對喇。」我見到他臉上出現一秒的兀突。
結帳前最後檢查，我把這對水晶捧在手心察看，心裡還是一個疑問︰除了切割，這種透明的物質跟玻璃有甚麼分別？
看著sales哥哥戴著手套把水晶放進禮物盒中，然後覆上典雅的包裝紙，再置入印有品牌的紙袋裡，最後繫上一張心意卡，這一刻我終於明白甚麼是女人的虛榮心。
這對可愛精緻的水晶結婚小熊，體積跟尾指相若，索價HKD $1250，多謝哂！
事後回電。
我︰（頹哂）如你所願喇.....
K︰辛苦哂妳喇...哈哈。
我︰我寧願佢請飲囉，起碼我有餐飯食....
K︰我請妳囉，今晚加餸當車馬費！
我︰我唔要丫，我而家心靈受創啊！
K︰未係住~如果妳買左部Hifi，到時我叫妳去退貨再買Swarovski，就真係心靈受傷喇！
我︰......（頂！）
沒有留言:
發佈留言